Əsgərov Şaiq Əhəd oğlu 1992-ci ildə Bakı Dövlət Universitetinin Jurnalistika, 1997-ci ildə Azərbaycan Dövlət İqtisad Universitetinin «Xarici iqtisadi əlaqələrin təşkili və dövlət tənzimlənməsi», 2002-ci ildə Azərbaycan Respublikası Prezidenti yanında Dövlət İdarəçilik Akademiyasının «Dövlət və bələdiyyə idarəetməsi» ixtisaslarını müvəffəqiyyətlə bitirmişdir.

Təhsil Nazirliyinin göndərişi ilə Azərbaycan Respublikası Silahlı Qüvvələr Hərbi Akademiyasının Strateji Tədqiqatlar və Dövlət Müdafiəsini İdarəetmə Akademik Kursunu uğurla yekunlaşdırmışdır. 2007-ci ildə “Elektron informasiya vasitələrində reklam bazarının marketinq tədqiqi və onun təkmilləşdirilməsi istiqamətləri” mövzusunda dissertasiya müdafiə etmiş və Ali Attestasiya Komissiyasının 10 iyul 2007-ci il tarixli 24-k saylı qərarı ilə iqtisad elmləri namizədi alimlik dərəcəsi, 9 aprel 2013-cü il tarixli 10-k saylı qərarı əsasında isə dosent elmi adı verilmişdir.

Elmi-tədqiqat və tədris işləri ilə Azərbaycan Dövlət İqtisad Universitetində müəllim, baş müəllim, dosent vəzifələrində çalışmışdır.
2001-2006-cı illərdə Azərbaycan Dövlət İqtisad Universitetinin tərbiyə işləri üzrə prorektoru vəzifəsində çalışmışdır.
2006-2015-cı illərdə Azərbaycan Təhsil İşçiləri Azad Həmkarlar İttifaqı Respublika Komitəsinin sədr müavini olmuşdur.

2007-ci ildən Respublika Təhsil Şurası İdarə Heyətinin üzvüdür. 2015-ci ilin sentyabrında UNEC-in İnzibati və təşkilati məsələlər üzrə prorektoru təyin olunmuşdur.

Dissertasiya işinin mövzusu üzrə 16 elmi əsəri, o cümlədən 14 məqaləsi, 1 dərsliyi (1 fəsil) və 1 metodiki vəsaiti çap olunmuşdur.

İşlədiyi müddətdə iqtisadi biliklərin təbliği və bir sıra sosial-ictimai sahədə göstərdiyi xidmətlərə və şəxsi yaradıcılıq uğurlarına görə «Azərbaycan bayrağı» diplomuna, «Nurlu qələm ustası» mükafatına layiq görülmüş, Təhsil Nazirliyinin və AHİK-in Fəxri Fərmanlarına, «Azərbaycan Respublikası Qabaqcıl Təhsil İşçisi» döş nişanına layiq görülmüşdür.

Azərbaycan Respublikası Prezidentinin 4 fevral 2013-cü il tarixli Sərəncamı ilə “Tərəqqi” medalı ilə təltif edilmişdir.
Azərbaycan Respublikası Prezidentinin 24 sentyabr 2020-ci il tarixli Sərəncamına əsasən Azərbaycan Dövlət İqtisad Universitetinin 90 illiyi münasibətilə və Azərbaycanda təhsilin inkişafındakı xidmətlərinə görə 3-cü dərəcəli “Əmək” ordeni ilə təltif edilmişdir.