Azərbaycan Dövlət İqtisad Universitetinin tarix muzeyi
4 yanvar 1985-ci ildə yaradılmışdır.
2001-ci ildən etibarən özünün ekspozisiya göstəriciləri və fondlaşdırma sisteminə görə müstəqil hüquqlu müəssisə olan UNEC-in Tarix Muzeyi haqqında Əsasnamə 16 iyul 2000-ci ildə AR Ədliyyə Nazirliyinin Bakı hüquqi şəxslərin qeydiyyat şöbəsində qeydiyyatdan keçərək 4 noyabr 2000-ci ildə universitetin Elmi Şurasında təsdiq edilmişdir.
Universitetin Tarix muzeyi bir sıra sosial funksiyaları: sənədləşdirmə, mühafizə, tədqiqatçılıq, təlim-tərbiyə və tədris işinin keyfiyyətinin yüksəldilməsini və s. yerinə yetirir, bu işlərin həyata keçirilməsində muzeyin əsaslı fondundan geniş istifadə olunur. Muzey 7 baş fonddan, o cümlədən 1500 əsas və 500 köməkçi fonddan ibarətdir.
Baş fond
Əsas fond
Köməkçi fond
Tarix Muzeyi UNEC-in rektorunun tabeçiliyindədir. Muzeyin strukturu – foto və kino sənədləri, elmi və təhsil-metodiki nəşrlər, multimediya vasitələri, çap materialları, əməkdaşların şəxsi əşyaları, universitetin mükafatları, universitetə və muzeyə verilən hədiyyələr, eksponatlardan ibarətdir.
Muzeyin əsas ekspanatlarından biri də 2007-ci il fevralın 8-də Azərbaycan Respublikasının Prezidenti cənab İlham Əliyevin və Heydər Əliyev Fondunun prezidenti Mehriban xanım Əliyevanın UNEC-in yeni tədris binasının açılış mərasimində iştirakına aid olan foto materiallardır.
UNEC Muzeyi universitetin və ümumilikdə Azərbaycanın təhsil və elmi irsini qoruyur, sənədləri, eksponatları və tarixi əşyaları gələcək nəsillərə çatdırır. Muzey universitetin keçmişində mühüm rol oynamış şəxslərin həyat və fəaliyyətini əks etdirməklə tələbələrə və ziyarətçilərə nümunə göstərir. Bu, milli və vətənpərvərlik ruhunun aşılanmasına xidmət edir.
Muzey cəmiyyətin kollektiv yaddaşının formalaşmasında mühüm rol oynayır. Universitetin keçmişi və nailiyyətləri haqqında biliklər cəmiyyətin təhsil tarixinə münasibətini müəyyənləşdirir. Muzey müxtəlif yaş qruplarından olan insanları bir araya gətirərək sosial qarşılıqlı əlaqəni təşviq edir. Eyni zamanda, digər muzeylər, elmi-tədris müəssisələri və ictimai təşkilatlarla əməkdaşlıq platforması yaradır.
UNEC Muzeyi universitetin ictimaiyyət qarşısında tanınmasına, yerli və beynəlxalq qonaqlar üçün cəlbedici mərkəzə çevrilməsinə kömək edir. Muzeyin turizm və tanıtım funksiyası onun həm universitet daxilində, həm də xaricində cəmiyyətə açıq olmasını, UNEC-in imicinin formalaşdırılmasını və Azərbaycanın təhsil tarixində tutduğu yerin nümayişini əhatə edir.
Muzey UNEC-ə gələn yerli və xarici nümayəndə heyətləri, tələbə qrupları və turistlər üçün maraqlı və zəngin məlumat mənbəyidir. Ziyarətçilər universitetin tarixi, inkişaf mərhələləri və təhsil sistemindəki rolu barədə birbaşa məlumat əldə edirlər. Bu isə UNEC-in yerli və beynəlxalq aləmdə tanınmasına şərait yaradır.
